Fáránlegt dæmi um hækkun kostnaðar.

Okkur hjónunum datt í hug í byrjun árs 2007 að prófa að taka bifreið á einkaleigu því okkur sýndist að það væri ekki dýrara heldur en eiga bifreið ef maður reiknaði dæmið til 3 ára og er þá búið að reikna inn smurkostnað sem er innifalin í leigunni og síðan viðgerða og viðhaldskostnað sem alltaf fellur til en er á ábyrgð bifreiðaumboðsins í þessu tilfelli.

Við tókum bifreið á leigu sem kostaði 3.070.000 kr og var leigan 57.000 kr á mánuði í febrúar 2007, lánið var gengistryggt 50% og hinn helmingurinn verðtryggður (sem betur fer). Leigan þróaðist þannig að meðalleiga fyrir árið 2007 var 665.796 eða 55.483 á mánuði vegna þess að hún lækkaði á tímabili vegna styrkingar krónunnar.

Leigan var 934.008 fyrir árið 2008 eða 77.834 á mánuði eða hækkun um 268.212 á milli ára og þá var okkar reikningsdæmi dottið upp fyrir sig, krónan hafði eyðilagt dæmið og það var ekkert vit í þessu lengur en við erum bundin þessum samningi í 3 ár.

Eins og staðan er í dag lýtur út fyrir að leigan fyrir þetta ár verði á bilinu 1.100.000 til 1.200.000 eða um tæplega 100% hækkun á 3 árum en þetta er allt í fínu lagi að mati ríkisstjórnarinnar okkar, lausnin er bara að lengja í lánunum og hlaða upp vaxtakostnaði og fara svo með stæl á hausinn þegar kemur að því að greiða að nýju.

Það má segja að þótt samningurinn okkar hafi orðið um 700.000 króna hærri á leigutímanum en við reiknuðum með þá verðum við laus frá bifreiðinni þegar við skilum henni og sitjum ekki uppi með gríðarleg afföll af henni eins og flestir bifreiðaeigendur þurfa að þola. Ég heyrði af bifreiðaviðskiptum um daginn þar sem bifreið sem á var sett 3.000.000 var seld á 1.800.000 sem er 40% afsláttur frá ásettu verði, þarna er fólk líka að tapa miklum fjárhæðum fyrir utan gríðarlegar hækkanir á gengis og verðtryggðum bílalánum.

Frábært framtak hjá FÍB að vekja máls á þessum þjófnaði, það eru svo sannlega mörg heimili að sligast vegna bifreiðakostnaðar eins og FÍB bendir á.

Óska eftir upplýsingum stjórnmálaflokka vegna bílalána

Athugasemdir

[runar (IP-tala skráð) 21.4.2009 kl. 12:18]

Það er rétt hjá þér að þessi nýja staða Íslendinga er skelfileg. En ég vil einnig bæta við að það er til hópur sem býr við 100-120% hækkun á öllu, ekka bara húsnæði og bílum heldur einnig orku,tryggingum og matvöruverði.

Þessi hópur eru nemar erlendis (ég er einn af þeim). Þessi hópur hefur fengið framan í sig yfir 100% hækkun á öllu. Þetta er óþolandi ástand, sérstaklega í ljósi þessa að öll orkunotkun hér erlendis er margfallt hærri per Kw stund en á klakanum. Einnig eru fasteignagjöld hér greidd óháð innkomu skuldarans, ólíkt Íslandi, og engar vaxtabætur koma til mín því þær eru veittar í formi skattaafsláttar sem nemar hafa afskaplega lítið gagn af. Svona er veruleikinn hér í ofurskattrugllandinu Danmörku.

Vart þarf að bæta því við að það eru engar leigubætur ætlaðar okkur, nemunum, sem voru svo drulluheimskir að fjárfesta í fasteign hér í DK.

Það kostar mig 700 þús ísl kr á ári að eiga fasteign hér. Þá á eftir að borga lán og orkugjöld. Ég fæ ekki krónu frá ríkinu þar á móti.

Ég sem hélt að ísland væri slæmt......... það er nefnilega til verra land, land sem eitt sinn seldi okkur maðka í mjölpokum.

Eitt að lokum... hér borga ég 220 kr fyrir bensínlíterinn.. geri aðrir betur !!

Ísland hefur sannarlega sína galla, en fólk heima má ekki gleyma því að það er til hópur landa þeirra sem hefur það mun verra en það sjálft !!

[Guðmundur Ásgeirsson, 21.4.2009 kl. 12:31]

Gengistryggð lán eru ólögleg samkvæmt lögum um vexti og verðtryggingu nr. 38/2001 !